ချန်ပီယံလိဂ် ခြေစစ်ပွဲစဉ် အဖြစ် ယှဉ်ပြိုင် ကစားခဲ့ကြတဲ့ လိုင်ယွန်နဲ့ စပါတာ ပရာဟာ တို့ရဲ့ ပွဲစဉ် မှာတော့ လိုင်ယွန်က တစ်ယောက်လျော့ စပါတာ ပရာဟာကို ၃-၀ နဲ့ အနိုင်ရရှိသွားခဲ့ပါတယ်။ ဒီပွဲမှာ လိုင်ယွန် အတွက် ဂိုးတွေ ကိုတော့ အာနက်စ် နူအာမား၊ အိန်စလေ မိတ်လန်း-နိုင်းလ်စ်နဲ့ တိုင်လာ မော်တွန် တို့က သွင်းယူပေးခဲ့ကြတာပါ။
ဒုတိယအကျော့ Groupama Stadium မှာ ကစားခဲ့တဲ့ ဒီပွဲမှာတော့ လိုင်ယွန်ဟာ ပထမအကျော့တုန်းက ၂-၁ နဲ့ ရှုံးနိမ့်ထားခဲ့တဲ့ ရလဒ်ကို အကောင်းဆုံး ပြန်လည် ခြေဖျက်ပြီး ပွဲကို အစစအရာရာ အသာစီးနဲ့ ကစားသွားခဲ့ပါတယ်။ စုစုပေါင်း ရလဒ် ၄-၂ နဲ့ အနိုင်ရရှိခဲ့တာကြောင့် လိုင်ယွန်ဟာ ချန်ပီယံလိဂ် အုပ်စုအဆင့်ကို တက်ရောက်ဖို့ အဆုံးအဖြတ် ပလေးအော့ဖ် အဆင့်မှာ တူရကီ ထိပ်သီး ကလပ် ဖီနာဘာချီနဲ့ ယှဉ်ပြိုင်ကစားရတော့မှာ ဖြစ်ပါတယ်။
ပွဲစလို့ မိနစ် ၂၀ မှာတင် လိုင်ယွန် အသင်းရဲ့ ဂိုးပေါက်တည့်တဲ့ ပထမဆုံး ကန်ချက် ကနေပဲ ဦးဆောင်ဂိုး စတင်ရရှိခဲ့ပါတယ်။ အသင်းခေါင်းဆောင် ကော်ရင်တန် တိုလစ်ဆိုရဲ့ ကန်ချက်ကို စပါတာ ပရာဟာ ဂိုးသမား ယာကုပ် ဆူရော့ဗ်စိခ် ပုတ်ထုတ်လိုက်ပေမယ့် ပြန်ထွက်လာတဲ့ ဘောလုံးကို အာနက်စ် နူအာမား က အနီးကပ် ပိတ်သွင်းသွားခဲ့တာပါ။
ဂိုးရပြီးနောက်မှာလည်း နူအာမားဟာ စပါတာ ပရာဟာ ခံစစ်ကို တောက်လျှောက် ဒုက္ခပေးခဲ့ပါတယ်။ ဂိုးပေါက်ဆီ တိုက်ရိုက် ဆွဲဝင်လာတဲ့ နူအာမားကို ဝင်ရောက် ဖျက်ထုတ်ခဲ့တဲ့ စပါတာ ခံစစ် ကစားသမား အာဒမ် ဆီဗင်းစကီးဟာ တိုက်ရိုက် အနီကတ်နဲ့ ထုတ်ပယ်ခံလိုက်ရတာကြောင့် ဧည့်သည် အသင်းဟာ ပွဲစစချင်းမှာတင် ၁၀ ယောက်တည်းနဲ့ ရုန်းကန်ခဲ့ရပါတယ်။
ဒုတိယပိုင်း မှာတော့ လိုင်ယွန်ဟာ တစ်ယောက် အသာစီးရထားတဲ့ အားသာချက်ကို အပြည့်အဝ အသုံးချခဲ့ပါတယ်။ လိုအစ် အိုပင်ဒါရဲ့ ခေါင်းတိုက်ချက် လွဲချော်ခဲ့သလို မာလစ် ဖိုဖာနာနဲ့ တိုင်လာ မော်တွန် တို့ရဲ့ အဝေးကန်ချက်တွေ ကိုလည်း စပါတာ ဂိုးသမား ကာကွယ်သွားနိုင်ခဲ့ပါတယ်။ အဲဒီနောက် မှာလည်း မော်တွန်ရဲ့ လှပတဲ့ ကန်ချက် တစ်ကြိမ် ဘားတန်းထိ ထွက်သွားခဲ့သလို လိုင်ယွန်ရဲ့ ဖိအားပေးမှုတွေက ဆက်တိုက်ဆိုသလို ရှိနေခဲ့တာပါ။
မိနစ် ၆၀ အရောက် မှာတော့ လိုင်ယွန်တို့ ဒုတိယဂိုး ထပ်မံရရှိခဲ့ပါတယ်။ တိုလစ်ဆိုရဲ့ မြေစိုက်ဖြတ်တင်ပေးလိုက်တဲ့ ဘောလုံးကို မိတ်လန်း-နိုင်းလ်စ်က အပိုင် ပိတ်သွင်းယူသွားခဲ့တာပါ။ အဲဒီနောက် ၇၂ မိနစ် မှာတော့ လစ်ဗာပူးလ် ကွင်းလယ်လူဟောင်း တိုင်လာ မော်တွန်က အဝေးကနေ ဂိုးရဲ့ ဘယ်ဘက်ထောင့်ဆီ လှလှပပ ဝေ့ဝိုက် ကန်သွင်းယူလိုက်ပြီး လိုင်ယွန် အတွက် အနိုင်ဂိုးကို အပြတ်အသတ် အတည်ပြုပေးခဲ့ပါတယ်။
စပါတာ ပရာဟာဘက်က အကောင်းဆုံး ဂိုးရရှိနိုင်မယ့် အခွင့်အရေး ကိုတော့ ပွဲပြီးခါနီးမှ ရရှိခဲ့ပြီး စန်တီယာဂို အန်နီမေးရဲ့ ပြင်းထန်တဲ့ ကန်ချက်ကို လိုင်ယွန် ဂိုးသမား ဒိုမီနစ် ဂရစ်ဖ် ကောင်းကောင်းမွန်မွန် ကာကွယ်သွားနိုင်ခဲ့ပါတယ်။ ပထမအကျော့မှာ ရှုံးနိမ့်ခဲ့ပေမယ့် ဒုတိယအကျော့ သူတို့ အိမ်ကွင်းမှာ ကစားရမှာ ဖြစ်လို့ လိုင်ယွန် အသင်း ဘက်က ယုံကြည်မှု အပြည့်ရှိခဲ့တာပါ။ ပွဲစစချင်းမှာ ပုံစံကောင်းရဖို့ စောင့်ဆိုင်းခဲ့ရပေမယ့် ကစားကွက် စမိသွားချိန် မှာတော့ စပါတာ ပရာဟာ အသင်း လုံးဝ လိုက်မမှီနိုင်အောင်ကို လွှမ်းမိုးသွားခဲ့ပါတယ်။
လိုင်ယွန်ဟာ တစ်ပွဲလုံးမှာ ဂိုးကန်သွင်းခွင့် ၁၉ ကြိမ် အထိ ဖန်တီးနိုင်ခဲ့ပြီး ၁၁ ကြိမ် ဂိုးပေါက်တည့်ခဲ့သလို စပါတာရဲ့ ဧရိယာ အတွင်း ဘောလုံး ထိချက်ပေါင်း ၂၆ ကြိမ် အထိ ရှိခဲ့ပါတယ်။ ပရိသတ်တွေ အကြိုက်တွေ့ခဲ့တဲ့ ကစားသမား ကတော့ နူအာမား ဖြစ်ပြီး သူဟာ တစ်ဦးတည်း တစ်ကိုယ်တော် ဘောလုံးဆွဲပြေးမှု ၇ ကြိမ် ပြုလုပ်ကာ ၄ ကြိမ် အောင်မြင်ခဲ့သလို ယှဉ်ပြိုင် လုယူမှု ၁၇ ကြိမ်မှာ ၁၀ ကြိမ် အထိ အနိုင်ရရှိခဲ့တာကြောင့် ဒီပွဲစဉ်ရဲ့ အကောင်းဆုံး ကစားသမား တစ်ယောက် အဖြစ် ခြေစွမ်းပြသသွားခဲ့တာ ဖြစ်ပါတယ်။
ဒီနိုင်ပွဲကြောင့် လိုင်ယွန်က ချန်ပီယံလိဂ် ခြေစစ်ပွဲ နောက်ဆုံး အဆင့်မှာ တူရကီ ထိပ်သီး ဖီနာဘာချီနဲ့ ရင်ဆိုင်ရတော့မှာ ဖြစ်ပါတယ်။ ဒါ့အပြင် ဆဲလ်တစ်၊ ဘိုဒို/ဂလင့်မ်၊ ဒိုင်နမို ဇာဂရက်ဘ်၊ AEK အေသင် တို့ကလည်း သက်ဆိုင်ရာ ပြိုင်ဘက်တွေနဲ့ ရင်ဆိုင်ပြီး ချန်ပီယံလိဂ် အဓိက ပြိုင်ပွဲကြီးဆီ တက်လှမ်းနိုင်ဖို့ ကြိုးစားကြရဦးမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
